img

DeltaLimburg.nl

Hèt informatieve (nieuws)platform voor Midden-Limburg.

19-11-2020 12:05

Vastelaovend in Nunhem - Vacature voor een fulltime Bosuulehieërser

Nunhem - 19 november 2020 - CV De Bosuule Nunhem heeft een vacature uitgeschreven voor een fulltime Prins of Prinses van ’t Bosuuleriëk. De criteria zijn o.a. dat je binnen 8 jaar de basisschool moet hebben afgerond, geen 9-tot-5 mentaliteit hebt, een gezonde dosis zelfspot hebt, goed kunt luisteren, vloeiend het Nunhems dialect spreekt en een levensgenieter bent. Interesse? Lees dan de hele vacaturetekst: 

img

De hele vacaturetekst:

"Dien take en verantjwaordelikhede

In de rol van Bosuuleprins of -prinses bisse emes dae gemekkelik mit miense om kin gaon, binne en boete ’t Bosuuleriëk. Doe kins sjturing gaeve aan ‘n ongecontroleerdj gezelsjap, o.a. de Raod van 11 Doe kins delegere en ‘t besjtuur henj vol werk bezorge mit ‘t organisere van activiteite in ’t coronajaor 2021. Doe sjnaps de impact van de Vastelaovendj en Carnaval, en doe wits dudelik ongersjied te make tusse allebei de festiviteite. Dien Bosuulehert mot roead gael en greun kloppe väör de Carnaval en Vastelaovendj in en rondjom ‘t dörpke Nûnem. Doe wits good om te gaon mit regels en wits wie det se dees väördeilig kins gebroeke in geval van eine roeadgaelgreune lock down. Doe wirks same mit de BOA’s (Bosuul Ontwikkeling Ambteniëre) mochte sommige Bosuule zich wille verplaatse nao aangrenzendje gebiede om ontwikkelingshulp te beje, zoeadet d’r ein dudelik contact blieftj besjtaon mit ‘t Centrale Bosuulenist; doe bis de sjpraekwaordelike Bosuul(in) op ’t nist. Doe höbs ein helicopterview, kins aafsjtandj haoje en höbs affiniteit mit 1,5 maeter sessies of festiviteite. Doe ongersjteuns ‘t ontwikkele van nuje ideeë zoeadet ’t Vastelaovesvirus de baovetoean blieftj veure.

Opleijing en eigesjappe

Basissjoeal aafgeröndj binne 8 jaor
Raod van 11 ervaring kin henjig zeen, mer is geine must
Energiek en creatief Gein 8 toet 5 mentaliteit en juus bereidj om ein sjtepke mieër te doon en nachtelike äöveroere te dreije
Basiskinnis of enige ervaring inne Carnavalsindustrie of Vastelaovesoetgaonswaereldj is mitgenomme
Gezonje dosis zelfsjpot
Doe loesters ieërst väördet se geis sjpraeke
Doe kins dich vloeiendj oetdrukke in ‘t ABN (Algemein Besjaafdj Nûnems), Nederlands is eine ‘nice to have’
Teamplayer, en zoea waer se ouch gezeen Sjtressbesjtenjig
Laevesgeneter

Väörwaarde

Doe bis gesjtationeerd in’t Bosuuleriëk, in de breidste zin van ’t waord. Doe wirks in eine waereldjwieje omgaeving, mer mos contact ongerhaoje mit de Bosuule en Bosuulinne zoeawaal op locatie as ouch in de satelietgebiede. Doe mos reize toet ein maximum van 11% in diene eige tiëd. Bosuule vlege in principe äöveral haer, in de gevalle det dit neet kin, waertj verveur geregeldj via de wensbus of taxi. Diene contractdoear löptj vanaaf 16 januari 2021 toet 11 november 2021. ‘t Besjtuur van de Bosuule dinktj det juust in dees tieje d’r nuuj Prinse of Prinsesse opsjtaon om de Vastelaovesvlam in ’t Bosuuleriëk helpe branjendje te haoje en zelfs aan te wakkere. Is dien interesse gewektj om dees oetdaging same mit os aan te gaon? Wils doe ‘t Vastelaovesvirus de baovetoean laote veure, den bis doe oze 65e Hieërser äöver ’t Bosuuleriëk! Sjtuur dien CV en diene motivatiebreef in eine gesjlaote envelop väör 11 december nao: Besjtuur CV de Bosuule, de Beemden 3, 6083 AH, Nûnem ter attentie van Steffie Vos. As se vraoge höbs äöver de vacante positie, nim den contact op mit Auke Adams (doe wits ‘m waal te bereike) De sollicatiegesjprekke zulle coronaproof plaatsvinje mit ‘t Dageliks Besjtuur."

Tags
Wellicht interessant